സാന്ത്വനമായി ശ്രീമുത്തപ്പൻ

 എം. രാജശേഖര പണിക്കർ

പറശ്ശിനിക്കടവ്ശ്രീമുത്തപ്പൻ

മുത്തപ്പൻ ആരാധനയുമായി ബന്ധപ്പെട്ട ഒട്ടനവധി മടപ്പുരകൾ ഉണ്ടെങ്കിലും ഏറ്റവും പ്രസിദ്ധമായത് പറശ്ശിനിക്കടവ് മടപ്പുരയാണ്. മുത്തപ്പൻ എന്നാൽ പറശ്ശിനിക്കടവ് എന്ന നിലയിൽ പുകഴ്പെറ്റതായിരിക്കുന്നു ഇവിടം. ലോകമെമ്പാടുമുളള മുത്തപ്പഭക്തർ ഇവിടെ ദർശനത്തിനെത്തുന്നു.

മുക്തേശ്വരനായ മുത്തപ്പൻ

മുത്തപ്പൻ മുക്തേശ്വരനാണ്. കാരുണ്യം ഉടൽപൂണ്ടവനാണ്. ശ്രേയസ്സും പ്രേയസ്സും നൽകി അനുഗ്രഹിക്കുന്നവനാണ്. ഭൗതികവും ആദ്ധ്യാത്മികവുമായ ദാഹങ്ങൾക്കെല്ലാം അവിടെ ശമനമുണ്ട്. മുത്തപ്പനുമായി കൂടുതൽ അടുക്കുന്തോറും ആഗ്രഹങ്ങൾ ക്ഷയിക്കുന്നു. മോഹക്ഷയത്തിന്റെ അവസ്ഥയിൽ മനുഷ്യൻ മുക്തിയോടടുക്കുന്നു.